xلاہور۔4جون(اے پی پی)پنجاب اچ صوبائی وزیراں کیتے سرکاری پٹرول ڳھنݨ تے پابندی لا ݙتی ڳئی اے جیندے بعد کوئی وزیر سرکاری پٹرول نہ ڳھن ڳھنسی اتے اپݨے کھیسے توں پٹرول پویسی۔ لاہور اچ میڈیا نال الیندے صوبائی وزیر عطا تارڑ آکھیے جو اٹے دی اسمگلنگ روکݨ کیتے پنجاب دی سرحد دی سخت نگرانی دا فیصلہ کیتے، پنجاب 50 لکھ ٹن کݨک دا ہدف پورا کیتے اتے پنجاب حکومت کݨک دی تھوڑ دا شکار صوبیاں دا ہتھ ونݙیسی۔ انہاں آکھیا جو پنجاب اچ وزیراں تے سرکاری پیسے نال پٹرول استعمال کرݨ دی پابندی لا ݙتی اے، سرکاری کم کیتے ونڄݨ آلے وزیر وی ذاتی خرچ تے پٹرول پوسین اتے سی ایم ہاؤس دے شاہانہ اخراجات تے وی پابندی لائی ڳئی اے، پنجاب حکومت بجٹ اچ وݙا ریلیف ݙیسی اتے مختلف سبسڈیز ݙتیاں ویسن۔
