اسلام آباد۔22مئی (اے پی پی) پاکستان اتے چین دا ہک ݙوجھے دے بنیادی فائدے اتے اہم خدشات کیتے آپݨی مضبوط حمایت اتے اعلیٰ ترین سیاسی سطح تے عملی تعاون سودھے سٹریٹجک رابطیاں کوں ودھاوݨ دے عزم دا اعادہ کیتے۔ فریقین عوام دی فلاح تے بہبود اتے مقامی کمیونٹیز کوں ودھ توں ودھ فائدہ پجاوݨ کیتے ترقیاتی حکمت عملیاں کوں ہم آہنگ کرݨ، سی پیک دے سارے منصوبیاں کوں محفوظ، ہموار اتے اعلیٰ معیاردے نال اڳوں ودھاوݨ اتے معیشت تجارت، سرمایہ کاری، صنعت، زراعت، صحت، اتے سائنس تے ٹیکنالوجی جیھے شعبیاں اچ تعاون ودھاوݨ دے پختہ عزم دا اظہار کیتا۔ ݙوہیں ملکاں علاقائی ملکاں اتے عالمی برادری تے دہشت گردی دی سارے شکلاں اتے مظاہر نال لڑݨ اتے ایں بارے ہم آہنگی پیدا کرݨ تے زور ݙیندیں ہوئیں عزم کیتا جو کہیں کوں وی چین اتے پاکستان وچال آہنی بھائی چارے کوں نقصان پجاوݨ دی موکل کائنا ݙتی ویسی۔ چین دے سٹیٹ قونصلر اتے وزیرخارجہ وانگ یی ، پاک چین اسٹریٹجک ڈائیلاگ اچ شرکت کیتے وزیرخارجہ بلاول بھٹوزرداری ولوں پاکستان دے دورے دی دعوت قبول کر ڳھدی۔ اے ڳالھ وزیرخارجہ بلاول بھٹوزرداری دے دورہ چین دے چھیکڑ تے جاری تھیوݨ آلے 15 نکاتی اعلامیہ اچ آکھی ڳئی۔
