ریاض ۔25اکتوبر(اے پی پی) وزیراعظم شہباز شریف سیلاب زدگان دی مدد کیتے ٻھرا ملکاں دا شکر ادا کریندے آکھیے جو موسمیاتی تبدیلیاں نال متاثرہ ملکاں دی عالمی سطح تے مدد کرݨی ہوسی، شمسی توانائی نال 10 ہزار میگا واٹ بجلی پیدا کرݨ کیتے پرامید ہیں، فضائی آلودگی مکاوݨ کیتے ماحول دوست توانائی ذرائع اپناوݨے ہوسن۔ سعودی عرب دے دارالحکومت ریاض اچ فیوچر انویسٹمنٹ انشیٹیو سمٹ اچ خطاب کریندے وزیراعظم آکھیا جو اڄ دا اے فورم وݙا اہم اے، مستقبل سانڳے سعودی قیادت دا وژن لائق تحسین اے، سعودی ولی عہد محمد بن سلمان ملک دے سڄاکے مستقبل کیتے متحرک ہین، ساکوں چنڳے مستقبل کیتے رل تے کم کرݨا ہوسی۔ وزیراعظم آکھیا جو سماجی ومعاشی ترقی کیتے تریمتیں دا بااختیار ہووݨ ٻہوں ضروری اے، عالمی معیشت دے چیلنجز اتے ایندے حل کیتے لائحہ عمل ٻݨاوݨا ہوسی اتے عام لوکاں دا جیوݨ سوکھا کرݨ کیتے اقدامات کرݨے ہوسن، ایں سانڳے جدید ٹیکنالوجی دا استعمال یقینی ٻݨایا ونڄے، معاشی ترقی کیتے ای کامرس دا فروٖغ لازم اے۔ شہباز شریف آکھیا جو پاکستان دی آبادی دا وݙا حصہ نینگر ہین، نوجوان نسل کوں جدید ٹیکنالوجی دو متوجہ کرݨ دی لوڑھ اے۔ انہاں آکھیا جو موسمیاتی تبدیلیاں پاروں پاکستان کوں سیلاب دیاں تباہ کاریاں ٻھوڳݨیاں پن اتے 3 کروڑ 30 لکھ لوک متاثر تھین، موسمیاتی تبدیلی ہک وݙا چیلنج اے، ساکوں بہتر مستقبل کیتے ہک ٻئے دا ہتھ ونݙیندے ہوئے رل مل تے کم کرݨا ہوسی۔ انہاں سیلاب زدگان دا ہتھ ونݙاوݨ تے ڄڳ دا شکریہ ادا کیتے۔ انہاں آکھیا جو توانائی دے مسلے دے حل کیتے شمسی توانائی تے توجہ اے، ایں سانڳے 10 ہزار میگا واٹ بجلی ٻݨاوݨ چاہندے ہیں، پنجاب اچ شمسی توانائی دا منصوبہ لائے، حکومت نجی شعبے دی حوصلہ افزائی کریندی پئی اے، فضائی آلودگی مکاوݨ کیتے ماحول دوست توانائی ذرائع اپناوݨے ہوسن۔
