اسلام آباد۔11نومبر(اے پی پی) نیشنل کمانڈ اینڈ آپریشن سنٹر (این سی او سی) کورونا وائرس دے پھیلائو تے قابو پاوݨ سانگے عوامی کٹھ تے پابندی،ٻے شعبیاں اچ پابندیاں ودھاوݨ دی تجویزڈتی اے۔وفاقی وزیر برائے منصوبہ بندی ، ترقی اتے خصوصی اقدام اسد عمر دی صدارت اچ این سی او سی دے اجلاس اچ تعلیم دے شعبے اچ وبائی مرڄ دے اعدادوشمار اتے بیماریاں دے پھیلائو دا جائزہ ڳھدا ڳیا۔فورم کوں ݙسیا ڳیا جو این سی او سی آپݨے حتمی فیصلے سانگے قومی رابطہ کمیٹی کوں 12 اکتوبر اتے ترائے نومبر کوں وڈے عوامی کٹھ اتے ٻاہرلی سرگرمیاں تے پابندی لاوݨ سانگے تجویزاں ݙتیاں ہن۔فورم کوں بریفنگ ݙتی ڳی جو تعلیمی اداریاں اچ وبا دا تناسب ودھدا ویندے جݙانجو ایں صورتحال تے نظر رکھݨ دی لوڑھ اے۔فورم ایں ڳالھ دا فیصلہ کیتا جو سولہاں نومبر کوں وفاقی وزیر تعلیم این سی او سی اچ صوبائی وزیرتعلیم نال ہک خصوصی اجلاس دی صدارت کریسن جئیں اچ ملک اچ کورونا دے کھنڈݨ دے رڄحان دا جائزہ ڳھدا ویسی۔ مشاورتی اجلاس دے بعد ایں نتیجے اچ تھیوݨ آلے تفصیلی فیصلے اتے نفاز سانگے سفارشاں صوبیاں نال شیئر کیتی ویسن۔این سی او سی شادی دی تقریباں بارے سارے سٹیک ہولڈرز نال سارے رہنما اصول شیئر کر ڈتن جئیں دے تحت 20 نومبر توں صرف ٻاہر شادیاں دے کٹھ دے موکل ہوسی جئیں اچ صرف پنج بندیاں دی شرکت دی موکل ہوسی۔این سی او سی مندرجہ ذیل سفارشاں اتے تجویزاں سارے سٹیک ہولڈرز دی آراء شامل کرݨ دے بعد این سی سی کوں بھیج ݙتن ۔فورم اے وی تجویز ݙتی اے جو سیمنا اتے تھیٹرز اتے مزاراں کوں فوری بند کر ݙتا ونڄے جݙانجو مارکیٹس اتے کاروباری مراکز کوں جلدی بند کرݨ اتے مخصوص ݙینھ اچ بند کرݨ دی سفارشاں وی پیش کیتی ڳئی۔
