اسلام آباد۔12مارچ(اے پی پی)پاکستان بھارتی میزائل دے حادثاتی لانچ تے حقائق دا درست تعین کرݨ کیتے مشترکہ تحقیقات دا مطالبہ کریندے آکھیے جو پورے واقعہ نال بھارت دی سٹریٹجک ہتھیاراں نال نمٹݨ کیتے سنگین کمزوریاں اتے تکنیکی خامیاں دی نشاندہی تھیندی پئی اے، پاکستان عالمی برادری توں جوہری ماحول اچ اینڄھے سنگین واقعے دا سنجیدگی نال نوٹس ڳھنݨ اتے خطے اچ تزویراتی استحکام کوں ودھاوݨ کیتے کردار ادا کرݨ دا مطالبہ کیتے۔ ترجمان دفترخارجہ آکھیے جو پاکستان انڈین پریس انفارمیشن بیورو دے ڈیفنس ونگ دے اخباری بیان کوں نوٹ کیتے جیندے اچ 9 مارچ 2022 کوں “تکنیکی خرابی” پاروں پاکستانی علاقے اچ بھارتی میزائل “حادثاتی فائر” تھی ڳعے جیندے تے افسوس کریندے ہوئے اندرونی عدالتی تحقیقات دا آکھیا ڳعے۔ ترجمان موجب ایں سنگین واقعے سیکیورٹی پروٹوکول اتے جوہری ماحول اچ میزائلاں دے حادثاتی یا غیر مجاز لانچ روکݨ کیتے تکنیکی حفاظتی اقدامات سانڳے کئی بنیادی سوالات اٻھارین۔ ترجمان آکھیا جو اینڄھے سنگین معاملے کوں بھارتی حکام دی سادہ وضاحت نال حل نئیں کیتا ونڄ سڳدا اتے کڄھ سوالاں دے جوابات ݙیوݨ دی لوڑھ اے۔
