اسلام آباد۔11ستمبر (اے پی پی) پاکستان ریلوے ، سندھ اتے بلوچستان دی ضلعی انتظامیہ نال رَل تے چھل دے علاقیاں اچ آپݨی سروس بحال کرݨ کیتے سارے وسائل لیندی پئی اے۔ وزارت دے ہک اہلکار اتوار کوں اے پی پی کوں ݙسیا جو وزیر ریلوے خواجہ سعد رفیق دی ہدایت تے محکمہ سندھ، بلوچستان اتے ملک دے ٻئے متاثرہ حصیاں اچ جلدی ٹریک دی بحالی کیتے کوششاں کریندا پئے۔ انہاں آکھیا جو پاکستان ریلوے کوں متاثرہ تنصیبات دا جاری سروے جنگی بنیاداں تے پورا کرݨ اتے بحالی دے عمل کوں تکھا کرݨ دی وی ہدایت کیتی ڳئی اے۔ انہاں آکھیا جو علاقےا چ چھل پاروں ریلوے پل ݙھݨ اتے ریل دی پٹڑیاں دے پاݨی اچ ٻݙ ونڄݨ دے بعد کوئٹہ اتے کراچی ڈویژن وچال ٹرین سروس معطل اے۔ باقی ڈویژنز اچ تقریباً ست توں اٹھ پلاں دا نقصان تھیے جئیں پاروں چھل دے علاقیاں اچ ٹریناں دی آمدورفت معطل اے۔ جݙاں تئیں پلاں اتے پڑیاں کوں چھل دے پاݨی توں صاف نی کیتا ویندا اوں ویلھے تئیں سروس بحال نی کیتی ونڄ سڳدی۔ انہاں ݙسیا جو ریلوے کوں ملک اچ بارشاں اتے سیلابی صورتھال پاروں 11 ارب روپے توں ودھ دا نقصان تھیے۔
