سکھر۔27دسمبر(اے پی پی) وفاقی وزیر شازیہ عطا مری آکھیے ساری پارٹیاں رل تے ملک بچاوݨ تے پی ٹی آئی اینکوں کمزور کرݨ چاہندی اے۔ اڄ دے ݙینھ پیپلزپارٹی کیتے وݙا سانحہ تھیا،بے نظیر بھٹو کوں جان دا خطرہ ہئی ایندے باوجود وطن واپس آئیاں، سیاست کنڈیں دی سیجھ اے ول وی اساں نبھیندے پیوں ۔ اے ڳالھ انہاں سکھر ایئرپورٹ تے میڈیا نال ڳالھ مہاڑ کریندے ہوئیں آکھی اے ۔ انہاں آکھیے عمران خان کوں ہیلی کاپٹر تے گھمݨ دی عادت پئے ڳئی اے، او لالچ دی وجہ توں ملک کوں ڈیفالٹ آلے پاسے ڳھدی ویندن ۔ جے انہاں کوں نہ ہٹایا ویندا تاں ملک سری لنکا وانڳوں ڈیفالٹ کرچکیا ہوندا ۔انہاں دا آکھݨ ہئی جو پی ٹی آئی کوں جے استعفیٰ ݙیوݨا اے تاں کئیں روکیے ۔ انہاں دے ممبران استعفیٰ ݙے تے ول سپیکر دے پیر وٹھیندن جو ساݙی تنخواہ تے مراعات نہ کٹیاں ونڄن ۔ شازیہ عطا مری آکھیے کے پی کے حکومت دہشتگرداں دے سامݨے وچھ ڳئی اے تے ایندا سامݨا نی کریندی پئی ، ملک دی بقا دی خاطر اساں پی ڈی ایم دا ساتھ ݙے تے نالائق حکومت دا خاتمہ کیتا ،سندھ اچ بدامنی تے ڳالھ کرݨ آلے باقی صوبیں دی حالت وی سامݨے رکھن ۔
