اسلام آباد۔9اگست (اے پی پی) وزیرِ اعظم محمد شہباز شریف آکھیا جو ترکیہ نال تجارتی تعلقات کوں ودھاوݨ چاہندون، ݙوپاسہ تجارتی حجم پنڄ ارب ڈالر سالانہ تئیں ڳھن ونجݨ کیتے ترجیحی بنیاداں تے کم کریندے پئیوں۔ وزیراعظم آفس دے میڈیا ونگ توں جاری بیان موجب اے ڳالھیں انہاں ترک وزیرِ تجارت و کسٹمز ڈاکٹر عمر بولات دی سربراہی اچ ترک سرمایہ کاراں دے اعلی سطح وفد نال ڳالھ مہاڑ کریندیں ہوئیں آکھی جنہاں جمعے کوں انہاں نال ملاقات کیتی۔ ملاقات اچ وفاقی وزرا خواجہ محمد آصف، محمد اورنگزیب، عبدالعلیم خان، سردار اویس لغاری، پاکستان دے ترکیہ اچ سفیر ڈاکٹر یوسف جنید وی شریک ہن۔ ترک وفد اچ ترکیہ دے نائب وزیرِ تجارت مصطفیٰ تزجو، TOBB دے صدر رفعت حصار جِکلیوعلو، DEIK دے صدر نَیل اولپک، ترکیہ کنٹریکٹر ایسوسی ایشن دے صدر ایردال ایرن، MUSIAD دے صدر محمود عصمالی، TUMSIAD دے صدر یشار دوعان، ASKON دے صدر اتےحان آئیدن، ترکیہ ایکسپورٹر اسمبلی دے صدر اتیلہ یرلیکایا اتے ALBAYRAK ہولڈنگ دے چیئرمین احمت البیراک دے نال نال پاکستان اچ ترکیہ دے سفیر مہمت پاچاجی شامل ہن۔ وزیراعظم آخھیا جو حکومت پاکستان ݙوہیں ملکاں وچال تجارتی تعلقات ودھاوݨ چاہندن۔ انہاں آکھیا جو ترک صدر رجب طیب ایردوان نال پاکستان اتے ترکیہ وچال تجارتی حڄم کوں اڄوکے سطح توں ودھا تے سالانہ پںج ارب ڈالر تئیں پڄاوݨ تے اتفاق تھیے۔ اینکوں پورا کرݨ کیتے ترجیحی بنیاداں تے کم کریندے پئیوں۔ وزیراعظم متعلقہ حکام کوں ترکیہ دے سرمایہ کاراں کوں پاکستان اچ سرمایہ کاری کیتے ہر قسم دی سہولت ݙیوݨ دی ہدایت کیتی۔ وزیراعظم ترکیہ دے صدر کوں جلدی پاکستان دورہ کرݨ دی دعوت دا اعادہ کریندیں ہوئیں آکھیا جو پاکستانی عوام ترکیہ دے صدر رجب طیب ایردوان دے پاکستان دے دورے دی راہ تکیندے پئن۔ ملاقات اچ ترکیہ دے وزیر تجارت آکھیا جو 54 ترک سرمایہ کار کمپنیاں دی پاکستان اچ سرمایہ کاری دا اڄوکا حجم 3.5 ارب ڈالر اے۔ ترک وفد 2023 دے زلزلے اچ پاکستان ولوں متاثرہ ترک ٻھیݨ بھراواں دی امداد تے وزیراعظم دا شکریہ ادا کیتا۔
.jpg)
