اسلام آباد۔11جون(اے پی پی):وفاقی وزیر خزانہ و محصولات سینیٹر محمد اورنگزیب آکھیے جو پائیدار، ہمہ جہت ملکی ترقی کیتے معیشت کوں دستاویزی ٻݨاوݨ، حکومتی اخراجات اچ کمی، ٹیرف اصلاحات اتے بنیادی معاشی ڈھانچہ وٹاوݨ ضروری اے، کوشش اے جو مجموعی طور تے ٹیرف رجیم اچ 4 فیصد دی کمی کیتی ونڄے، 2 ٹریلین دے اضافی ٹیکس اقدامات اچ 312 ارب روپے دے نویں ٹیکس ہین، 2 ٹریلین دے اضافی اہداف دا زیادہ تر حصہ خودمختار نمو اتے انفورسمنٹ دے اقدامات نال ڳھدا ویسی، 9.4 ٹریلین دی غیردستاویزی معیشت کوں دستاویزی ٻݨآوݨ ضروری اے، ستمبر اچ یورو بانڈز نال 500 ملین ڈالر پاکستان کوں مل ویسن۔ اسلام آباد اچ پوسٹ بجٹ کانفرنس نال خطاب کریندے وزیر خزانہ آکھیا جو قومی ترقی کیتے معیشت دے بنیادی ڈھانچے وچ تبدیلی لازمی اے، پائیدار اَتے ہمہ جہت ملکی ترقی کیتے معیشت کوں دستاویزی بݨاوݨ، حکومتی اخراجات وچ کمی، اَتے ٹیرف اصلاحات سودھا بنیادی معاشی ڈھانچے کوں تبدیل کرݨ ضروری اے۔ انہاں زور ݙتا جو 9.4 ٹریلین دی غیر دستاویزی معیشت کوں دستاویزی بݨاوݨ وی ہک وݙا چیلنج اے۔ وزیر خزانہ ݙسایا جو 2 ٹریلین دے اضافی ٹیکس اقدامات اچوں 312 ارب روپے دے نویں ٹیکس ہین، جݙاں جو بقیہ زیادہ تر حصہ خودمختار نمو اَتے انفورسمنٹ دے اقدامات توں حاصل کیتا ویسی۔ انہاں واضح کیتا ڄیکر انفورسمنٹ دے اقدامات نہ ہوسن تاں اساکوں 400 توں 500 ارب روپے دے اضافی ٹیکس لاوݨے ہوسن۔ انہاں آکھیا جو ایں سانڳے قانون سازی کیتی ویسی اَتے پارلیمنٹ دے ݙوہاں ایواناں کوں اعتماد اچ گھِدا ویسی۔ ایں سال جی ڈی پی دے تناسب نال ٹیکساں دی شرح 10.3 فیصد رہی جیڑھی آندے مالی سال وچ 10.9 فیصد تھی ویسی۔ ٹیرف اصلاحات دے حوالے نال انہاں آکھیا جو 7 ہزار ٹیرف لائنز وچوں 4 ہزار تے اضافی کسٹم ݙیوٹی صفر کر ݙیتی ڳئی اے، اَتے 2700 تے کسٹم ݙیوٹی دی شرح گھٹ کیتی ڳئی اے۔ وزیر خزانہ دے مطابق، 2 ہزار اینجھے ٹیرف لائن ہین جیندا تعلق خام مال نال اے، جیندے نال برآمدی صنعت کوں یقینی طور تے فیدہ پڄسی، ٹیرف اصلاحات دا سلسلہ جاری رہسی اَتے انہاں دی کوشش اے جو مجموعی طور تے ٹیرف رجیم وچ 4 فیصد دی کمی گھن آئی ونجے۔ وزیر خزانہ ݙسایا جو سرکاری ملازماں دیاں تنخواہیں اچ 10 فیصد وادھے نال خزانے تے 28 توں 30 ارب روپے دا اضافی بوجھ پووݨے۔ انہاں آکھیا جو تنخواہ دار طبقے کوں زیادہ توں زیادہ ریلیف ݙیوݨ دی کوشش کیتی ڳئی اے بھل ایںدے اچ مالی گنجائش کوں وی ݙٹھا ڳئے۔ پنشن اصلاحات دا عمل وی جاری اے اَتے حکومت پنشن کوں افراط زر نال جوڑ ݙتے۔ وزیر خزانہ واضح کیتا جو بجلی دے بلاں تے 10 فیصد سرچارج نئیں لایا ڳیا۔ انہاں ایں ڳالھ دی تردید کیتی جو گزریل سال کھاداں اَتے کیڑے مار ادوایات تے ٹیکس لاوݨا ہئی، اَتے وزیراعظم دی ہدایت تے آئی ایم ایف نال ڳالھ مہاڑ کیتی ڳئی ہئی تاں جو ایں ٹیکس کوں ایں سال نہ لایا ونڄے۔ زراعت کوں معیشت دا انجن قرار ݙیندے انہاں ݙسایا جو زرعی جی ڈی پی اچ ڈیری اَتے لائیو سٹاک دا حصہ تقریباً 60 فیصد اے۔ سٹوریج سہولتاں، فنانسنگ اچ وادھا اَتے چھوٹے کساناں کوں قرضیاں دی فراہمی کیتی ویسی، اَتے ایں حوالے نال صوبیاں نال رَل تے کم کیتا ویسی۔ تعمیراتی شعبے اچ ٹیکس گھٹ نئیں تھیا، ٻھل ٹرانزیکشن دی لاگت اَتے اخراجات کوں گھٹ کرݨ دی کوشش کیتی ڳئی اے۔ 5 مرلہ گھر بݨاوݨ آلیاں کیتے مارگیج فنانسنگ اچ سہولتاں ݙتیاں وینداں پین، جیںدے کیتے سٹیٹ بینک نال ڳالھ مہاڑ جاری اے۔ وزیر خزانہ آکھیا جو حکومت اخراجات تے قابو پاوݨ دی ودھ کوشش کیتی اے۔ ایں سال حکومتی اخراجات اچ صرف 1.9 فیصد دا معمولی وادھا تھئے۔ انہاں آکھیا جو حکومت سبسڈیز کوں ختم کریندی پئی اے اَتے قرضیاں دے انتظام کوں وی بہتر بݨایا ویندا پئے۔ انہاں ݙسایا جو ستمبر اچ یورو بانڈز توں 500 ملین ڈالر پاکستان کوں وصول تھی ویسن۔ این ایف سی (قومی مالیاتی کمیشن) دے امور صوبیاں دی مشاورت نال اڳو تے ودھائے ویسن، اَتے وزیراعظم آپ آکھیے جو اگست اچ این ایف سی دا اجلاس ہوسی۔ وزراء اَتے پارلیمنٹیرینز دیاں تنخواہواں وچ وادھے بارے انہاں آکھیا جو آخری واری 2016 وچ تنخواہواں کوں ایڈجسٹ کیتا ڳیا ہئی، ایں کیتے ہݨ وادھا زیادہ لڳدا پئے۔ ماحولیاتی تبدیلی دے حوالے نال انہاں ڈان گروپ دے اقدامات کوں سراہیا اَتے آکھیا جو اے وقت دی وݙی لوڑھ اے حکومت دے نال رَل تے گلوبل وارمنگ دے حوالے نال اقدامات کیتے ونڄن۔ ملک وچ 63 فیصد نوجواناں کیتے آندے مالی سال دے بجٹ وچ ترجیحی بنیاداں تے اقدامات کیتے ڳئن۔ رواں سال پاکستانی یوتھ فری لانسنگ دے ذریعے 400 ملین ڈالر کمائے ہن، اَتے ایکوں بہتر بݨاوݨ کیتے مزید اقدامات کیتے ویندے پئن۔ چیئرمین ایف بی آر ݙسایا جو لوکل سولر اَتے امپورٹڈ سولر تے ٹیکس کوں یکساں کیتا ڳئے اَتے کافی سودھا چار درآمدی شئیں کوں تریڄھے شیڈول اچ رلایا ڳئے تاں جو قیمتاں دے فرق دی نگرانی کیتی ونڄ سڳے۔ غیر منافع بخش اداریاں کیتے نواں نظام متعارف کرایا ڳئے جیںدے تحت کوئی وی ادارہ سکروٹنی توں باہرو نہ ہوسی اَتے ذمہ داری اَتے جوابدہی کوں یقینی بݨایا ویسی۔ پاور سیکٹر اچ ریکوریز بہتر تھئن اَتے ہݨ ٹرانسمیشن نقصانات کوں گھٹ کرݨ تے کم تھیندا پئے۔ ضم شدہ ضلعیاں وچ سیلز ٹیکس دا اطلاق مرحلہ وار ہوسی اَتے پہلے مرحلے وچ 10 فیصد دی گھٹ شرح نال ایں دا اطلاق کر ݙیتا ڳئے۔ وزیر خزانہ دی اے بریفنگ حکومت دی معاشی پالیسیاں اَتے آئندے مالی سال کیتے انہاں دے منصوبیاں دی ہک تفصیلی جھلکی ݙیندی اے۔
.jpg)
